Nagduso karon og motion for inhibition ang prosekusyon batok sa Presiding Judge nga si Rebecca Guillen-Ubaña sa Manila Regional Trial Court-Branch 40, nga nag-gunit sa kaso sa unom ka mga akusado nga adunay kalabotan sa pagkahanaw sa mga sabungero sa Manila Arena.
Sa pahayag ni Senior Assistant State Prosecutor Katheryn May Penaco-Rojas nga gibasura sa Manila RTC-Branch 40 ang ilahang mosyon nga magpagawas og bag-ong warrant of arrest batok sa mga akusado. Kini bisan pa sa desisyon sa Court of Appeals niadtong Enero nga nagkansela sa pyansa sa unom ka mga akusado nga nalambigit sa pagdagit ug serious illegal detention nga nahitabo sa Manila Arena niadtong Enero 2022.
Sumala pa sa Prosekusyon, gipaguwa ang desisyon, apan bag-o lamang niini nakuha ang kopya.
Sa laing bahin, mipahayag ang abugado sa depensa nga si Atty. Angelo Santos nga muduso usab sila og ilahang tubag sa motion for inhibition batok sa Huwes.
“Well, we’ll be filing our comment. I haven’t read it pa kasi we haven’t checked the motion,” matod ni Santos atol sa panayam sa GMA Integrated News human sa pagdungog sa korte.
Kabahin sa desisyon sa Court of Appeals nga nagkansela sa pyansa sa iyang mga kliyente, miduso na ang depensa og motion for reconsideration sa appellate court.
Sa pagkakaron, nagpaabot na lamang ang prosekusyon sa desisyon sa Court of Appeals sa ilahang mosyon batok sa Huwes sa Manila RTC ug sa motion for reconsideration sa depensa.
