Nagpahimangno ang Philippine National Police (PNP) nga dakpon nila si Senador Ronald “Bato” dela Rosa kon motunga kini sa impeachment trial ni Vice President Sara Duterte karong Hulyo 6.
Sumala kang PNP Public Information Office Chief Col. Allen Rae Co, adunay mandato ang kapulisan nga ipatuman ang pagdakop sa senador kon kini ilang matultolan o motunga sa publiko.
Kahinumdoman nga giisyuhan si Dela Rosa og warrant of arrest sa International Criminal Court (ICC) may kalabotan sa kasong crimes against humanity nga nalambigit sa kampanya batok sa ilegal nga droga sa administrasyon ni kanhing Pangulong Rodrigo Duterte.
Sa pagkakaron, wala pa nagpakita sa publiko ang senador sukad mogawas ang maong warrant. Gipasabot sa PNP nga andam silang ipatuman ang balaod sa higayon nga matultolan ang iyang kinaroroonan o kon motunga siya sa bisan unsang opisyal nga kalihokan, lakip na ang impeachment trial ni VP Sara Duterte.
