Nakiglambigit na ang Philippine National Police (PNP) sa nagkalain-laing ahensya sa gobyerno ug international law enforcement organizations aron beripikahon ang report sa pagkadakop ni kanhi Ako Bicol party-list Representative nga si Zaldy Co sa Prague, Czech Republic ug sa Germany.
Sumala kang PNP Chief Police General Jose Melencio C. Nartatez Jr., ginabuhat na karon ang beripikasyon pinaagi sa opisyal nga mga channel aron masiguro ang detalye sa maong insidente.
Dugang pa niya, andam ang PNP sa paghatag sa gikinahanglang tabang ug suporta sa mga legal nga proseso, lakip ang koordinasyon alang sa posibleng pagbalik ni Co sa Pilipinas, subay sa pahayag ni Pangulong Ferdinand Marcos Jr..
Una nang gipahibalo sa Pangulo nga nadakpan si Co human siya mosulod sa Czech Republic nga kulang og dokumento ug karon anaa na sa kustodiya sa mga awtoridad sa maong nasud.
