DAVAO CITY – Gibaha ang pipila ka mga lugar sa dakbayan kagabie samtang misaka sab ang tubig baha sa Davao river partikular na sa Bankerohan kini hatud sa walay puas nga pag-ulan nga nagsugod kagahapon sa hapon.
Kahinumduman nga adunay namatikdang Low Pressure Area (LPA) nga nakaapekto sa pipila ka area sa Mindanao hinungdan nga kamatikdan ang daut nga kahimtang sa panahon.
Gilayon sab dayon nga gipahimangnoan sa Barangay Disaster Risk Reduction and Management Office (BDRRMO) ang mga nanimuyo daplin sa Talomo ug Davao river nga mohikling human nga miabot na sa kritikal level ang halos na miabot na sa mga panimalay.
Bisan nga adunay uban nga mitamud sa kamandoan ug miadto sa mga evacuation center apan dili pa gihapon kalikayan nga adunay pipila ang nagpabilin nga nagmagahi.
Kahinumduman nga sa milabay nga tuig, pipila ka higayon nga nakasinate ug halapad nga pagbaha ang dakbayan diin daghanan panimalay sa bankerohan ug Jade Valley ang apektado.
Subli sab nga nagpahimangno ang hingtungdan nga ahensiya sa kagamhanan nga dili na hulaton pa ang mga pahimangno sa higayon nga paspas ang pagsaka sa tubig arun nga dili mabutang sa risgo ang kinabuhi.
