Nagpakita ang mga Pilipino og maayong pagsalig sa Estados Unidos ug Japan, samtang ubos ang pagsalig nila sa China, Palestine ug Iran, sumala sa pinakabag-ong survey sa Social Weather Stations (SWS).
Base sa Second Quarter 2026 Social Weather Survey nga gihimo niadtong Hunyo 20 hangtod 29 pinaagi sa face-to-face interviews sa 1,200 ka mga hamtong sa tibuok nasud, nakabaton ang Estados Unidos og +42 net trust rating samtang +36 ang Japan, nga parehong giila nga adunay “good” o maayong lebel sa pagsalig.
Dugang pa niini, nakakuha ang Australia og +29 o “moderate” nga trust rating, samtang ang Israel nga adunay -5 ug Russia nga adunay -8 giisip nga “neutral.”
Sa laing bahin, nakarekord ang China og -16, Palestine og -19, ug Iran og -23, nga tanan giila sa SWS nga adunay “poor” o ubos nga lebel sa pagsalig.
Matud pa sa SWS, sukad pa kaniadtong 1994 nagpabiling positibo ang net trust rating sa mga Pilipino sa Estados Unidos. Samtang ang China, sa 74 ka mga survey sukad 1994, siyam lamang ka higayon nga nakabaton og positibong trust rating.
Sa pagkakaron, ang maong survey wala gipondohan sa bisan unsang grupo ug adunay margin of error nga +3 porsyento sa national results.
