DAVAO CITY – Gitambagan karon sa Philippine Institute of Volcanology and Seismology (PHIVOLCS) ang mga residente nga nadaut ang mga panimalay tungod sa linog nga mamahimo na kining makatukod og temporary nga kapuy-an apan maayo sumala pa nga mga kahoy lamang una ang gamiton nga mga materyales.
Tipik lamang kini human nga mikunhud na matud pa ang ilang natala nga mga aftershocks ilabi na sa North Cotabato ug mga kasikbit nga lugar.
Una ng gibutyag ni PHIVOLCS Kidapawan field officer Milo Tabigue nga mikabat sumala pa sa kapin 2,000 ka mga aftershocks apan 97 lamang niini ang namatikdan.
Nasayran nga sa lima ka mga fault lines sa Cotabato fault system, ang Makilala-Malungon ang pinakadako nga aduna’y gitas-on nga 65 kilometros.
Gani aduna sumala pa kini katakos nga makamugna ug magnitude 7.2 ug Intensity 8 nga linog ug makonsidera nga “the big one” sa lalawigan sa SOCCSKSARGEN.
