Gikumpirma sa Presidential Communications Office (PCO) nga walay kausaban sa iskedyul sa state visit ni Pangulong Ferdinand Marcos Jr. ngadto sa Canada, bisan pa sa kalit nga rally nga gipahigayon sa Iglesia Ni Cristo (INC) sa EDSA niadtong miaging adlaw.
Sumala pa kang PCO Secretary Dave Gomez, ipadayon gihapon sa Pangulo ang iyang pagbisita sa Vancouver, Canada sugod Hulyo 1 hangtod Hulyo 5.
Dugang pa niini, lakip sa agenda sa maong state visit ang pagtambong sa mga business forum, diin makigtagbo si Pangulong Marcos sa mga Canadian investors aron dasigon ang dugang pamuhunan sa Pilipinas, ilabina sa information technology (IT), infrastructure, ug energy sector.
Sa kasamtangan, sumala sa opisyal nga pahayag, kini ang unang state visit sa usa ka Presidente sa Pilipinas ngadto sa Canada sulod sa kapin napulo ka tuig, ug gitan-aw nga usa ka lakang aron mas mapalig-on pa ang dugay nang diplomatikong relasyon ug kooperasyon tali sa duha ka nasod.
