DAVAO CITY – Gibutyag ni PLt. Dante Espejon, Deputy Commander sa Bunawan Police Station nga aduna nay resulta ang otopsiya nga gipahigayon sa usa ka patay’ng lawas sa usa ka lalake nga gituohang upat hangtud lima ka adlaw na nga namatay ayha kini napalgan nga gilubong sa Gatungan, Bunawan ning syudad.
Gikanayon ni Espejon nga subay sa inisyal nga resulta sa otopsiya, gibunalan og bug-at ug gahing butang ang dughan sa biktima tungod nasayrang nabali ang ribs niini.
Dugang pa, adunay miadto sa punerarya aron nga tan-awon ang patay’ng lawas apan naglisod og ila ang miduaw tungod anaa na sa state of advance decomposition ang lawas niini.
Apan, nagpabilin gihapon nga malaumon ang kapulisan nga mailhan na ang identity sa biktima ug kabahin niini, wala matud pa gilabay ang sanina nga suot niini aron dali kining mailhan og galing adunay muduaw sa patay’ng lawas.
Kahinumduman nga nagsul-ob ang biktima og cargo shorts ug itom ug puti nga stripes t-shirt.
