DAVAO CITY – Giila ni Mary Jane Jumento Ibay, 45 anyos nga taga Talomo Proper, Davao City ang patay’ng lawas nga nakaplagan kagahapon sa 11:30 sa buntag sa Baybayon sa Brgy. Centro, Agdao, Davao City. Sumala pa ni Mary Jane, patay’ng lawas kadto sa iyang ka live in partner nga si Brian Martinez Dique, 44 anyos.
Usa ka semana na matud pa nga missing si Dique. Subay sa initial report sa PNP, napalgan sa duha ka mananagat ang patay’ng lawas sa biktima usa ka kilometro ang gilay-on gikan sa baybay sa Brgy. Centro. Agdao nga nakaputos sa sako sa feeds ang ulo og tiil.
Dihang gihiling kini, nasuta nga naka packaging tape ang tiil ug ulo sa biktima samtang gihiktan usab og twine straw ang kamot ug gitaptapan og duck tape ang baba niini. Gipataban sa patay’ng lawas ang plywood nga dunay sulad nga “Holdaper ko sa panel sa Davao City.”
Kahinumduman nadiskobrehan ang patay’ng lawas nga naglutaw-lutaw kagahapon sa buntag sa duha ka mananagat nga mao sila Leonardo Hernandez Montes, 48 anyos; ug Angelito Villanueva Labador, 53 anyos, parehong taga-San Marcos, Brgy. Centro, Agdao, ning syudad.
Sa kasamtangan, gihaya na ang patay’ng lawas sa biktima sa usa ka lokal nga punerarya sa Panacan samtang nagpadayon gihapon ang imbestigasyon sa otoridad sa maong krimen.
