DAVAO CITY – Nagbangutan ang mga ginikanan ni alyas Ina, 12 anyos nga grade 6 student, human nga makita ang viral video sa gihimong pagpangulata sa upat ka mga Junior High School Students ngadto sa ilang anak niadtong nakalabay nga adlaw didto sa Barangay Tuban, Sta. Cruz, Davao del Sur.
Hugot ang baruganan karon sa mga ginikanan sa biktima ilabi na sa inahan nga si Regina Ramos nga wala matud pa silay plano nga makig-areglo sa mga ginikanan sa mga suspek. Gibutyag sa inahan ni alyas Ina nga magpasaka gayud sila og kaso batok sa mga suspek ug dili sila makig-areglo gumikan gawas pa sa nasinatian nila nga tumang kasuko ug kasakit, buot nila nga dili na kini masubli pa ug wala nay laing indibidwal nga madagmalan o makulatahan ang nahisgutang mga suspek.
Kaganihang buntag, miadto sa buhatan sa Department of Social Welfare and Development (DSWD) ang amahan ni alyas Ina aron atubangon ang mga ginikanan sa mga nangulata sa ilahang anak. Sa pikas bahin, gikanayon ni Regina nga walay misulay atubang nga mga ginikanan sa mga suspek ngadto kanila aron nga hisgutan ang maong panghitabo.
Sa maong pagpangulata, ang 12 anyos nga bata naka-angkon og daghang samad ug bun-og sa ulo, liog, dalunggan ug likod nga bahin niini, diin dili matod pa kini makatulog og tarong tungod sa kasakit. Sumala pa sa inahan nga usa ka malipayon nga bata si alyas Ina apan karon halos dili na kini maistorya og tarong.
Gikanayong pito ka mga batan-on ang involved sa maong panghitabo diin upat ka mga babae ang nagtabang og kulata kang alyas Ina, samtang usa ang nagkuha og video ug duha ka mga lalaki ang nagpaka-aron ingnong tig-uwang sa nahitabong pagpangdumog.
Sa kasamtangan, wala pa nasayud ang ginikanan ni alyas Ina kung unsa ang rason sa pagpangulata sa mga suspek, apan nahibaloan nga adunay grupo o gang ang mga nahisgutan nga mao ang “Black Angel”. Nasayrang usab nga adunay daang bikil si alyas Ina batok sa mga suspek.
