Gisugyot sa gobyerno ang P7.2 trilyon nga nasudnong badyet alang sa 2027, nga mas taas og unom ka porsiyento kumpara sa P6.793 trilyon karong tuiga, bisan pa sa gipaubos nga target sa pagtubo sa ekonomiya ug gilaumang kita sa gobyerno.
Sumala pa sa Department of Budget and Management (DBM), limitado ang fiscal space sa gobyerno tungod sa awtomatikong mga paggasto sama sa National Tax Allotment, pagbayad sa utang, ug uban pang obligadong gastuhan.
Dugang pa niini, giingong nakaapekto sa pag-andam sa badyet ang giingong mga iregularidad sa flood control projects, ingon man ang tensiyon tali sa Estados Unidos, Israel ug Iran, lakip ang hulga sa El Niño ug climate change, nga nakaapekto sa ekonomiya ug sa kapasidad sa gobyerno nga maabot ang gitinguhang kita ug economic growth.
Sa kasamtangan, gipaubos sa Development Budget Coordination Committee (DBCC) ang GDP growth target alang karong tuiga ngadto sa 3.5% hangtod 4.5%, ubos sa miaging target nga 5% hangtod 6%, human mirehistro ang ekonomiya sa nasud og 2.8% lamang nga pagtubo sa unang quarter—ang pinakahinay sulod sa miaging lima ka tuig.
