Gibalibaran ni Israeli Prime Minister Benjamin Netanyahu ang 15-point US-led nga plano alang sa Gaza nga gisuportahan sa Hamas, nga nagpakita sa bag-ong panagbangi sa iyang posisyon ug sa administrasyon ni US President Donald Trump.
Nagkanayon si Netanyahu nga dili dawaton sa Israel ang maong dokumento ug dili mopahawa ang Israeli military sa Gaza hangtod nga hingpit nga ma-disarm ang Hamas.
Gihulagway ni Netanyahu si Trump isip ilang “greatest friend in the White House”, apan iyang gipasiugda nga andam ang Israel nga ipahayag ang mga pagsupak niini sa plano ngadto sa Estados Unidos.
Nag-atubang usab si Netanyahu og pressure gikan sa iyang right-wing allies samtang nagkaduol ang eleksyon sa Israel sa Oktubre 27, 2026 diin ang mga survey nagpakita og hugot nga kompetisyon alang sa iyang kampo.
Gisuportahan sa Hamas ang Gaza plan ug nanawagan sa Washington nga pugson si Netanyahu ug ang iyang gobyerno sa pagsunod sa roadmap ug dili pugngan ang proseso niini tungod sa internal political ug electoral nga mga interes.
Gipasiugda sa maong plano ang hinay-hinay nga pag-disarm sa Hamas ug ang pag-atras sa Israeli forces sa Gaza. Apan, klaro nga gisalikway ni Netanyahu ang maong timeline ug miinsistir nga kinahanglan una ang tinuod ug hingpit nga pag-disarm sa Hamas ayha mo-atras ang ilang military forces.
Nagpadayon usab ang tensyon sa Gaza bisan pa sa pagkunhod sa operasyon sa Israeli forces sukad gipahibalo ang plano. Matud sa civil defence spokesman nga si Mahmoud Bassal, nasamdan sa Israeli gunfire ang usa ka bata sa Khan Yunis niadtong Domingo ug gidala sa ospital.
Sumala sa health ministry sa Gaza, nga naglihok ubos sa awtoridad sa Hamas ug kansang mga numero giisip nga kasaligan sa United Nations, 1,258 ka Palestinian ang namatay tungod sa Israeli operations sukad sa ceasefire. Lima usab ka sundalong Israeli ang gikataho nga namatay sa maong panahon.
