DAVAO DEL SUR- Napuno sa kasadya ang panimalay sa boxingerong si Nesthy Petecio, human kini nakasulod sa semifinals sa women’s 50kg division, kagabii. Kini human nga napildi ni Nesthy ang pambato sa nasud China nga si Xu Zichun via unanimous decision.
Kalabot niini, hilabihang kalipay ang nabatian sa ginikanan sa atleta gumikan na usab sa pagsunod sa gikabutyag nilang estratehiya. Ubay-ubay sab sa mga supporters ni Nesthy sa Davao del Sur ang nibisita sa ilang panimalay aron sa pagsaksi sa dula niini.
Una nang gitagna ni Oscar Agape Jr, Coach sa Boxing nga dako og lamang si Petecio sa dula batok sa China hilabi pa nga ikaduhang higayon na kining misalmot sa Olympics. Dugang sab ni Agape nga gawas sa kusog ni Nesthy, hilabihan usab kamaayo ang punches sa atleta nga nahimo gayud niyang kusog ug lamang gikan sa mga kalaban.
Kahinumduman nga giangkon sa amahan ni Nesthy ang kakulba sa nakalabay nga dula ni Nesthy apan nagpadayon gihapon ang iyang pag-ampo ug panghinaot nga makaabante pa kini sa dula.
Alayon niini, nanawagan ang amahan ni Nesthy sa katawhang Pilipino nga i-uban gayud kanunay sa pag-ampo ang journey sa iyang anak lakip na ang uban pang atletang pambato sa Pilipinas sa nagpadayong Paris Olympics 2024.
