Motestigo karong adlawa Hulyo 13, 2026 si Atty. Jeremy Lotoc, Regional Director sa NBI–Bangsamoro Autonomous Region in Muslim Mindanao (BARMM), isip sunod nga testigo sa House prosecution panel sa pagpadayon sa impeachment trial batok kang Vice President Sara Duterte.
Matod ni House prosecution spokesperson ug Lanao del Sur Rep. Zia Alonto Adiong, ipresentar ni Lotoc ang resulta sa imbestigasyon sa National Bureau of Investigation (NBI) kabahin sa giingong hulga batok sa kinabuhi ni Pangulong Ferdinand Marcos Jr., First Lady Liza Araneta-Marcos, ug kanhing House Speaker Martin Romualdez.
Mosunod ang testimonya ni Lotoc sa naunang pagpamatuod ni NBI Senior Agent John Mark Calilung, nga mikompirma sa pagka-awtentiko sa mga video recording ug digital files nga may kalabutan sa pahayag sa Bise Presidente kaniadtong Nobyembre 23, 2024.
Sa maong video, gitaho nga miingon si VP Sara nga adunay iyang gikontrata nga tawo aron patyon sila PBBM, First lady, ug si Romuadlez kung siya mapatay.
Nagkanayon si Rep. Zia Alonto Adiong nga si Lotoc maoy mopresentar sa resulta sa imbestigasyon sa NBI, apan wala siya mihatag ug dugang detalye tungod sa nagpatuman nga sub judice rule.
Gitugyan usab sa House prosecution panel ngadto sa Senado ang pagpaminaw sa testimonya ni Lotoc isip kabahin sa nagpadayon nga presentasyon sa ebidensiya batok sa Vice President.
Nakasentro gihapon ang impeachment case sa giingong grave threats o ang aricle IV nga nalambigit sa pahayag ni Duterte atol sa usa ka online press briefing.
