DAVAO CITY- Gibutyag sa Department of Public Works and Highways (DPWH) nga ang approved final alignment sa multi-billion 3.98-kilometer Samal Island-Davao Connector (SIDC) project usa ka produkto sa komprehensibong pagtuon sa mga eksperto.
Sumala pa sa maong ahensya nga gihatagan og importanteng konsiderasyon ang maong final alignment taliwala sa mga pag-angkon sa Pamilya Rodriguez, diin matod pa nila nga ang nahisgutang pagtuon adunay kakulangon sa konsultasyon ilabina sa hustong pagkonsulta sa mga tag-iya sa yuta gikan sa Ove Arup & Partners Hong Kong Ltd.
Dugang niini, gikonsidera usab matud pa ang gikinahanglan nga navigational safety management alang sa seacraft o mga sakyanang pangdagat ug height restriction alang sa air transport.
Nasayrang ang landing point sa tulay nga giilang Davao City-Samal Bridge ang nahimutang sa baybayon sa Costa Marina Beach Resort nga kasikbit ngadto sa Paradise Island Park & Beach Resort nga nahimutang sa Barangay Caliclic, Babak District of the Island Garden City of Samal (IGACOS).
Kahinumdumang gipahayag sa Pamilya Rodriguez nga ang pagpadayon sa kasamtangang alignment moresulta sa dili mabalik nga kadaot sa Paradise Reef nga adunay 300 metros nga sumpay nga reef.
VIA|| Kaye Marie Gulle
