Mihangyo sa Supreme Court (SC) ang mga pamilya sa mga namatay sa war on drugs ni kanhing Pangulong Rodrigo Duterte nga ideklarang supak sa Konstitusyon ang mga polisiyang nahimong basihanan sa kampanya batok sa ilegal nga droga sa miaging administrasyon.
Pinaagi sa ilang mga abogado gikan sa CenterLaw Philippines, gisumite sa mga petisyoner ang usa ka Manifestation and Urgent Motion for Resolution aron aghaton ang Korte Suprema nga desisyonan na ang mga kasong wala pa maresolba sukad pa kaniadtong tuig 2017.
Sakop sa petisyon ang 26 ka komunidad sa Maynila nga giingong nakaagi og pagpang-harass atol sa kinapungkayan sa war on drugs apan wala gihingalan ang mga maong lugar alang sa ilang seguridad.
Gihangyo usab nila ang SC nga ideklarang supak sa Konstitusyon ang Philippine National Police Command Memorandum Circular 16-2016 o “Project Double Barrel,” nga nahimong basihanan sa anti-drug operations. Matud nila, nagpadayon gihapon ang maong polisiya ug mahimo pang magamit sa mga umaabot nga operasyon.
Dugang pa, nangayo usab ang mga pamilya og writ of amparo, tungod sa giingong padayon nilang nasinati nga mga hulga, pagpanghadlok ug sayop nga impormasyon.
Kahinumduman nga kaniadtong Marso 2025, gidakop si kanhing Pangulong Rodrigo Duterte pinaagi sa warrant sa International Criminal Court (ICC) may kalabotan sa kasong crimes against humanity, ug gidala sa The Hague, Netherlands aron atubangon ang pagtaral.
