DAVAO CITY – Mamahimong dakung hagit ngadto sa bag-ong Hari sa Britanya nga si King Charles III ang mga isyu nga kasamtangang ginaatubang karon sa United Kingdom bag-o pa mipanaw si Queen Elizabeth II.
Mao kana ang usa sa mga nakita ni Bombo Special Correspondent sa UK nga si Dean Rowe.
Sa pakighinabi sa Bombo Radyo Davao kang Rowe, gikanayon niya nga nagpabiling nasa kritikal nga estado sa krisis pang- ekonomiya ang nasud gumikan sa nagpahinabong COVID 19 Pandemic.
Sigun sab ni Rowe nga dakung babag sa mamahimong kausaban sa monarkiya ang pagdawat sa ilang katawhan ngadto kang King Charles III nga nihulip karon sa rayna, pipila ka adlaw human sa iyang kamatayon.
Naandan na sa mga Briton ang nahimong pagpagatundan ni Queen Elizabeth II sulod sa kapin sitenta ka tuig nga paglingkod sa trono.
Busa daw angay lamang nga ipadayon ni King Charles III ang iyang nasugdan.
Nagpaibabaw gihapon ang pagkasubo sa mga katawhan sa nasud United Kingdom atol sa kamatayon sa Queen Elizabeth II.
Kasamtangang suspendido ang halos tanang mga negosyo ug patigayon sa nasud ilawum sa mourning period.
Nagpaabot sab ug pahasubo ang tanang tawo gawas sa Westminster Hall aron maghatag ug respeto ngadto sa rayna.
Niabot na sa Edinburgh, Scotland ang lungon sa rayna human sa unom ka oras nga prusisyon gikan sa Balmoral Castle diin asa siya mipanaw.
Nakatakdang magpahigayon ug public viewing sa Westminster Hall sa London gikan Setyembre 14 sa alas-singko sa hapon hangtud Setyembre 19, adlaw sa iyang lubong, sa alas sais y media sa buntag, oras sa United Kingdom.
via || Bombo LJ Florendo
