Padayon ang pagpauli sa suplay sa kuryente sa Manila Electric Company o Meralco samtang kapin 38,000 ka customer niini ang wala pa gihapon makadawat og kuryente tungod sa epekto sa kusog nga hangin ug ulan.
Sumala kang Meralco Vice President ug Head of Corporate Communications Joe Zaldarriaga, mikunhod na kini gikan sa kinatas-ang hapit 98,000 ka customer nga nawad-an og kuryente kagahapon.
Kadaghanan sa mga apektado naa sa Cavite, gisundan sa Metro Manila, Bulacan, Rizal, Laguna ug Batangas. Matud ni Zaldarriaga, kadaghanan sa pagkawala sa kuryente tungod sa pagkadaot sa mga pasilidad sa Meralco nga naapektuhan sa kusog nga hangin ug ulan.
Gilauman nga mabalik ang suplay sa kadaghanan sa mga apektadong lugar karong gabii o ugma, gawas sa mga lugar nga gibahaan ug lisod maabot sa mga trabahante.
Samtang, gipahinumdoman sa Meralco ang publiko nga likayan ang mga naputol nga linya sa kuryente, nadaot nga electrical facilities ug mga gamit sa kuryente nga nalubog sa baha.
Gihangyo usab ang mga residente nga palungon ang main electrical power o circuit breaker kon magsugod ang pagbaha aron malikayan ang disgrasya ug peligro sa makuryente. | VIA BOMBO EROS PAJOTA
