DAVAO CITY – Gipasalig karon ni Davao City Mayor Sebastian “Baste” Duterte nga mas pakusgan pa niini ang Peace and Order sa syudad.
Kung kahinumduman, niadtong Marso ning tuig kasamtangan lamang, hingpit na nga gideklara sa Armed Forces of the Philipines ang syudad sa Davao isip insurgency-free. Ning bag-ohay lamang, mitambong ang mayor sa gipahigayon nga Kasalan ng Barangay sa Brgy. Lumiad, Paquibato District ning syudad.
Atol sa iyang pagtambong, gibutyag sa mayor nga gilauman karon sa syudad nga padayon gayud nga mahatagan og kasulbaran ang mga problema sa katawhan pinaagi sa pagpalig-on sa kalinaw ug kahusay sa mga barangay sama na lamang sa Paquibato Area.
Nagpasalamat sab ang mayor ngadto sa mga tigdumala sa barangay gumikan sa ilang walay hunong nga paghatag og suporta sa mga nagkadaiyang programa sa panggamhanan sama na lamang sa Peace 911.
Sa pikas bahin, gihatagan usab og gimbug-aton ni Mayor Baste ang Anti-Criminality campaign sa syudad diin mibahad kini ngadto sa mga masinupakon ug sa mga adunay dautang laraw nga dili sila welcome diri sa syudad. Sa pikas bahin, gipasalig sab ni Baste nga padayon ang paghatud og mga serbisyo ug programa sa syudad ngadto sa katawhang dabawenyo.
