Gikumpirma sa Philippine National Police (PNP) General Hospital nga angayan nang ibalhin ug biyaheon si Senador Rodante Marcoleta human mahatagan og medical clearance sa mga doktor.
Sumala pa sa PNP General Hospital, bisan og fit to travel na ang senador, girekomenda gihapon sa mga doktor nga mahuman una niya ang iyang pagtambal ug pag-inom sa antibiotics alang sa iyang mild pneumonia hangtod sa Hulyo 15, 2026.
Matod pa kang Lt. Col. Benaly Bayani, lig-on na ang kahimtang ni Marcoleta ug mahimo na siyang moatubang sa korte kon magsul-ob siya og face mask. Gidugang pa nga wala na usab siya makasinati og kalisod sa pagginhawa.
Kahinumduman, na-confine si Marcoleta human makasinati og pagsakit sa dughan ug pagsaka sa presyon sa dugo pagkahuman sa iyang pagdakop may kalabotan sa kasong plunder niadtong Hulyo 6. Lakip sa nasuta sa mga doktor nga kondisyon sa senador ang degenerative disc disease ug altapresyon.
Sa pagkakaron, gilauman nga ihatod si Marcoleta sa Sandiganbayan aron ipatuman ang commitment order batok kaniya sa higayon nga mahuman na ang iyang pagtambal.
