Gitahod sa Malacañang ang desisyon sa Sandiganbayan nga nagtugot sa temporaryong kagawasan ni kanhi Senador Bong Revilla Jr. pinaagi sa piyansa. Sumala pa kang Palace Press Officer Undersecretary Claire Castro, anaa na sa mga prosekutor ang pagdesisyon kon unsang legal nga lakang o remedyo ang ilang himuon may kalabotan sa maong desisyon.
Dugang pa niini, gibutyag ni Castro nga ang balaod ug ang hustong proseso kinahanglan kanunay nga maoy mopatigbabaw sa tanang kaso. Lakip sa nahibal-an nga nakagawas sa kustodiya si Revilla human tugoti sa Sandiganbayan nga makapiyansa og P1 milyon. Kahinumduman nga sa resolusyon sa Anti-Graft Court, giingong napakyas ang prosekusyon sa pagpresentar og igo ug lig-on nga ebidensya aron mapamatud-an ang giingong sala ni Revilla sa kasong falsification of documents nga may kalabotan sa malversation of public funds.
Sa pagkakaron, wala pa mopagawas og dugang pahayag ang kampo ni Revilla ug ang prosekusyon bahin sa sunod nilang mga lakang sa maong kaso.
