DAVAO CITY – Manghud mitigbas sa iyang magulang gumikan sa panag-ilog sa yutang kabilin sa Barangay Tanwalang, Sulop, Davao del Sur.
Naila ang biktima nga usa ka Maximino Sarcaogas, 62 anyos, menyo, mag-uuma, residente sa Purok 1, Barangay Tanwalang, Sulop nga nagpabilin pa karon sa Davao del Sur Provincial Hosital.
Suspek sa krimin mao ra sab ang iyang manghud nga usa ka Ismael Sarcaogas, 54 anyos, residente sa nahisgutan nga dapit.
Nasayran nga gi-atangan sa suspek ang iyang magulang samtang nagbaktas sa dalan pauli sa ilang pinoy-anan, ug diretso nga gitakdangan sa dala niini nga sanggot nga ginagamit sa pagpang-apit sa sanggutan.
Nakahi-agum ug mga samad inabisan ang biktima sa iyang likod ug ulo nga bahin, hinongdan nga nadala sa balay tambalanan sa Davao del Sur Provincial Hospital.
Dali nga miikyas ang suspek, apan mipahigayon sab dayon ug follow-up operation ang kapolisan ug nadakpan ang suspek nga kasamtangan nabalhug na sa bilanggo-an sa Sulop PNP.
