Mikunhod pag-ayo ang suplay sa tubig sa munisipyo sa Caraga, Davao Oriental human maabot sa kritikal nga lebel ang tubig sa Magongon Spring, ang pangunang tinubdan sa tubig sa komunidad.
Sumala sa Caraga Waterworks System, ang padayon nga kakulang sa tubig nga nasinati sulod sa kapin tulo ka bulan maoy hinungdan sa dakong pagkunhod sa water yield sa tinubdan. Tungod niini, napugos ang buhatan nga magpatuman og Water Supply Scheduling aron mapadayon ang patas nga pag-apod-apod sa limitadong suplay sa tanang konsumante, ilabina sa Poblacion area.
Base sa abiso, ang suplay sa tubig ipanghatag matag turno. Gikan alas-4:00 sa buntag hangtod alas-4:00 sa hapon, apektado ang mga residente sa Purok Daisy, Calamansi, Sunflower, ubos nga bahin sa Purok Santan ug Santana, apil ang pipila ka bahin sa Purok Bougainvilla ug Stardust. Samtang gikan alas-4:00 sa hapon hangtod alas-4:00 sa buntag, ang suplay igahatag sa Purok Rose, taas nga bahin sa Purok Santan, Bougainvilla, ug Stardust.
Gipasabot sa waterworks office nga ang kakulang sa ulan ug dugay nga hulaw maoy dakong hinungdan sa pag-ubos sa lebel sa tubig sa Magongon Spring. Giingon usab nga kung magpadayon ang kasamtangang kahimtang, posible pang mapalawom o mapahugtan ang water scheduling sa umaabot.
Nanawagan ang lokal nga water provider sa katawhan nga magtinabangay pinaagi sa responsable ug tinipid nga paggamit sa tubig, ilabina sa mga oras nga aduna pay suplay. Giduso usab ang pagtipig og tubig alang sa pangunang panginahanglan sama sa pag-inom, pagluto, ug kahinlo.
Sa karon, nagpadayon ang monitoring sa kahimtang sa tinubdan samtang nagtan-aw ang lokal nga panggamhanan og dugang nga lakang ug alternatibong solusyon aron masiguro ang igong suplay sa tubig alang sa mga residente sa Caraga.
