Gidayeg ni PCOL Julius Silagan, ang Provincial Director sa Davao Oriental ang nahimong kalampusan sa mga ginsakpan niini sa pagpakgang kang alyas “Abay” sa pagbuhat sa mga iligal nga binuhatan human nga napatay kini sa operasyon sa mga kapulisan human nga nipakita sumala pa og pagsukol.
Naila ang suspek nga si Rey Juan Madanlo alyas “Abay” leader sumala pa sa Repolyo criminal gang kon mas naila nga Madanlo Criminal Group. Subay sa report sa mga otoridad, gilusad ang hiniusang operasyon sa mga otoridad sa Davao Oriental Police Provincial Office uban ang 2nd DOPMFC, Mati CPS, NICA, RIU, TIU, PITDOR, DavOr MARPSTA, ug RID ilawom sa LOI Manhunt Charlie nga malampuson nga natunol ang warrant of arrest ngadto sa suspetsado samtang anaa kini sa Campo 1 District, Barangay Sainz, Mati City pasado ala-Una sa kaadlawon niadtong Hwebes.
Apan sumala pa sa mga otoridad nga samtang ilahang gisilbi ang arrest warrant, kalit sumala pa nga mibunlot ang suspek sa iyang calibre .45 nga pistola og gipusil ang mga kapulisan. Nahitabo sumala pa ang engkwentro tali sa mga otoridad nga miresulta sa kamatayon sa suspetsado tungod sa mga pinusilan nga iyahang nahiaguman.
Gidala pa sa Davao Oriental Provincial Medical Center ang suspek aron masalbar pa ang kinabuhi apan gideklara kining patay sulod samtang ginatambalan. Sa crime scene naukmpiska ang usa ka .45 Colt’s Government Model nga pistola, steel magazines, mga bala, basyo sa bala og mga kagamitan sa suspetsado.
Nasayran nga si Madanlo adunay 16 ka ihap sa kasong pagpatay kon murder kung diin 11 ka mga warrant of arrest ang naggikan sa Munisipalidad sa Lupon samtang ang 5 niini naggikan sa dakbayan sa Mati City. Gawas niana nga mga kaso adunay duha usab ka Attempted Murder nga tina-usa sa dakbayan sa Davao ug Mati.
