Luwas nang nakabalik sa Pilipinas ang 10 sa 21 ka Pilipinong tripulante sa oil tanker nga MT Aqua 1 human kini giigoan og Iranian missile sa Persian Gulf duol sa Qatar niadtong unang semana sa Abril.
Sumala pa ni Hans Leo Cacdac, kalihim sa Department of Migrant Workers, ang maong mga tripulante miabot na sa nasod ug sa pagkakaron gihatagan na og tabang sa Overseas Workers Welfare Administration alang sa ilang panginahanglan ug rehabilitasyon.Lakip pa sa iyang gipahibalo, ang nahibilin pang mga Pilipinong tripulante nga sakay sa oil tanker anaa sa maayong kahimtang ug sa kasamtangan gilauman nga moabot usab sa Pilipinas sa umaabot nga mga adlaw.
Sa kasamtangan, sumala sa report, ang MT Aqua 1 naglayag sa layong 17 nautical miles sa amihanan sa Ras Laffan Industrial Hub sa Qatar sa dihang kini giigoan og cruise missile gikan sa Iran niadtong Abril 1, 2026, nga miresulta sa sunog nga dali ra usab naapula sa mga tripulante. Dugang pa niini, gipahimangnoan nga sa maayong kapalaran, walay bisan usa sa 21 ka Pilipinong tripulante ang nasamdan sa maong insidente, sumala sa kumpirmasyon sa mga otoridad.
