DAVAO CITY – Nahuwad ang daghanang sludge oil kon lana duol sa pantalan sa Davao-Samal Port, sa may Sasa Onse, ning dakbayan niadtong milabayng gabii.
Sumala sa taho sa Coast Guard District Southeastern Mindanao and Special Operations Unit, girespondehan kini sa ilang mga sakop ug gilayon silang naglusad og clearing operations sa ground zero.
Nasayran nga nikatag ang maong lana bandang alas-7:30 sa gabii sa gibana-banang gilay-on nga 200 cubic meters.
Nigamit ang maong team og absorbent boom ug absorbent pads aron makunhuran ang posibleng kadaot sa pagkatag sa maong lana sa mga kadagatan.
Human sa upat ka oras nga operasyon, anaa sa 30 litros sa lana kon slugde oil ang narekober sa mga sakop sa Coast Guard human sa clean-up operations.
Gipanubayan pa sa otoridad ang hinungdan sa maong oil spill.
