Patay na sa dihang nakaplagan ang lawas ni Edgardo Antoc, alyas ‘Tata,’ 52 anyos, nga naglutaw sa sapa sa Prk. 7 Feria St., Brgy. Calinan Poblacion, Calinan District, Davao City.
Sa eksklusibong pakighinabi sa Bombo Radyo Davao kang Eduardo Antoc, igsuon sa biktima, iyang gipahayag nga kagabii pa miadto sa usa ka tapok sa imnanan ang biktima.
Sumala kang Antoc nga nagselebrar og kasal ang ilang silingan, busa nagpabilin didto ang iyang igsuon aron magtagay kauban ang ubang mga bisita.
Matod pa ni Eduardo, pagkadlawon nangita na siya sa iyang igsuon, apan wala na niya kini makita sa maong dapit.
Gilauman niya nga basin nakatug lang kini, apan wala gyud niya kini makit-an.
Karon buntag, usa ka residente ang nakakita sa lawas sa biktima nga naglutaw sa sapa, hinungdan nga dali siyang gipahibalo.
Nanghinaot kini nga wala untay foul play nga makita ang otoridad, rason nga sa pagkakaron, temporaryo kining nagtuo nga aksidente lang ang nahitabo.
Sumala usab kang Raymond Ramos, usa ka residente sa maong dapit, nakadungog siya og tapok sa mga tawo kaganihang alas singko sa buntag, rason nga dali kining nanawag sa mga otoridad.
Padayon pa ang imbestigasyon sa otoridad aron masuta og adunay laing anggulo sa insidente.
Sa karon, anaa na sa punerarya ang lawas ni Edgardo samtang padayon nga naghulat ang mga otoridad sa resulta sa dugang imbestigasyon aron matino ang tinuod nga hinungdan sa pagkamatay ni Antoc.
