Nakabenipisyo ang kapin 8,500 ka Agrarian Reform Beneficiaries o ARBs gikan sa Davao del Norte, Davao de Oro ug Davao Oriental sa mga programa sa Department of Agrarian Reform o DAR Region XI atol sa Stakeholders Forum nga gipahigayon sa Tagum City Hall Atrium niadtong Hunyo 3.
Lakip sa gipanghatag sa DAR ang 132 ka electronic land titles, 5,473 ka Certificates of Condonation with Release of Mortgage o CoCROMs ug kapin P4.1 milyon nga kantidad sa mga farm machinery ug kagamitan.
Dugang pa, anaa sa kapin P509.6 milyon nga kantidad sa wala mabayring land amortizations, interes, penalties ug surcharges ang gipasaylo ubos sa New Agrarian Emancipation Act.
Usa sa mga nahimong highlight sa kalihokan mao ang paghatag sa 132 ka e-titles nga gilangkuban sa 114 ka ektarya nga yuta ug nakahatag og seguradong pagpanag-iya sa yuta ngadto sa 2,882 ka ARBs sa Davao del Norte.
Samtang 5,473 ka CoCROMs usab ang gipanghatag ngadto sa 8,548 ka benepisyaryo nga gilangkuban sa kapin 22 mil ka ektarya nga agricultural land sa tulo ka probinsya sa rehiyon.
Gipang-turnover usab sa DAR ngadto sa mga Agrarian Reform Beneficiary Organizations o ARBOs ang nagkadaiyang kagamitan sa panguma lakip ang rice combine harvester, hand tractors, three-wheel pick-up vehicle ug farm tractor aron mapalambo pa ang produksyon sa agrikultura sa rehiyon.
