DAVAO CITY – Anaa sa halos 20 ka mga Public Utility Vehicles (PUV) ang nasikop ug na-siyuhan og Inspection Report Summons kon IRS atol sa gipahigayong Oplan Lambat Bitag Sasakyan Operation o istriktong Anti-Colorum Operations sa Land Transportation Franchising and Regulatory Board XI sa mga nagkadaiyang checkpoints sa dakbayan.
Kini dungan sa pagpartisipar sa LTFRB XI sa gilusad nga Oplan Kalinaw sa Davao City Police Office – Traffic Enforcement Unit. Gipangunahan mismo ni LTFRB XI Regional Director Nonito Llanos III ang maong operasyon diin nakighiusa usab alang niini ang mga miyembro sa Davao City Security and Safety Cluster sama sa Land Transportation Office (LTO), City Transport and Traffic Management Office (CTTMO), Highway Patrol Group Region XI ug uban pang mga ahensya.
Anaa sa 18 ka mga PUV ang nasikop diin gilangkuban kini sa duha ka Public Utility Jeepneys (PUJ), duha ka Taxi units, duha ka Public Utility Buses (PUBs), ug dose ka mga UV Express. Subay niini, nagpahinumdom na lamang ang buhatan ngadto sa publiko nga dili magpasagad og sakay sa mga colorum nga Public Utility Vehicles aron malikayan ang aberya sa pagbyahe.
