Gipaklaro ni kanhi LTFRB Chairman na si Atty. Martin Delgra ang mamahimong bili sa consolidation nga ginapadasig karon sa mga drayber ug operator alang sa PUV Modernization Program sa gobyerno.
Sa eksklusibong pakighinabi sa Bombo Radyo Davao, gikanayon ni Delgra nga tumong sa pagmugna og hugpong o kooperatiba nga mahiusa ang mga drayber og operator isip nag-unang rekesitos sa Modernization Program.
Partikular nang gipunting ni Delgra ang nahimong katag-katag nga sistema sa mga PUJ tungod sa 1 is to 1 ratio nga siste sa pampublikong jeepney diin usa ka unit og usa ka operator lamang ang mudala sa maong behikulo alang sa usa ka ruta.
Buot ipasabot ni Delgra nga sa pamaagi sa consolidation, ang mga drayber ug operator mismo ang dungan nga mulatas sa mga nataganang ruta.
Dugang pa ni Delgra, mas mamahimong sistematiko ang pagpadagan sa ruta sa usa ka namugna nga kooperatiba o ang ginatawag nga route rationalization.
Benepisyal sab ang mamahimong pagpadagan sa koop tungod sa taas nga dibidendo o kita lakip na mga benepisyo nga makuha sa matag myembro.
Gawas sab sa mga training alang sa mga drayber alang sa pagpa-improve sa ilang driving compentency, aduna sab nga lay off alternative livelihood program alang sa mga drayber nga buot manginabuhi gawas sa pagpamasada aron aduna gihapon mapagkuhaan og kitaan alang sa pamilya.
Gipaklaro sab ni Delgra ang naunang pamahayag nga i-phase out ang mga jeepneys sa tibuok nasud. Sanglit, i-modify lamang ang mamahimong disenyo sa jeepney ug dungagan og mga security features sama sa CCTV ug GPS alang sab sa luwas ug kunbinyente nga pagbyahe sa mga pasahero.
Nanawagan sab ang kanhi LTFRB chairman ngadto sa mga transport groups nga magpahigayon og usa ka simana nga transport strike lakip na ang pipila ka mga civil groups nga musuporta niini nga dili kini ipadayon tungod makaapekto sab kini sa ekonomiya ug pang-adlaw adlaw sa mga empleyado ug mga pamilya, lakip na ang pagtuon sa mga estudyante.
Nag-awhag sab si Delgra ngadto sa mga drayber ug operator nga makisayod sa maong programa alang sa kabag-uhan sa industriya sa transportasyon dinhi sa nasud.
via || Bombo LJF
