Nangayo og katin-awan ang International Criminal Court (ICC) Prosecution ngadto sa mga huwes aron ipasabot sa defense counsel ni kanhing Pang.Rodrigo Duterte ang papel sa unom ka Filipino nga abogado.
Lakip sa gihisgutan mao sila Salvador Medialdea, Salvador Panelo, Martin Delgra III, Silvestre Bello III, Alfredo Lim, ug Cesar Dulay.
Gipaila sila sa defense counsel nga si Nicholas Kaufman isip mga abogado nga mitabang ug misuporta bisan paman og naglingkod lamang sila sa gallery sa korte.
Una nang gibutyag ni Kaufman nga duha sa mga nahisgutan nga sila Medialdea ug Delgra ang matud pa dugay na nga mitabang sa defense team.
Samtang gikumpirma usab ni Panelo nga ang defense team nakatakdang makigtagbo sa mga Filipino lawyers aron hisgutan ang ilahang estratehiya sa umaabot nga pagdungog.
Sa unom ka pahinang dokumento nga gipagawas nga adunay gipetsahan niadtong Marso 6, gikanayon nga ang mga pahayag nila Kaufman ug Panelo mahimong makahatag og impresyon nga ang unom ka abogado miyembro gayud sa defense team ni Duterte.
Tungod niini, gihangyo sa ICC Pre-Trial Chamber-I ang mga defense lawyer nga magpasa og pormal nga pahayag nga ang unom ka gihisgutan dili opisyal nga miyembro sa defense team sa kaso.
Gipangayo usab sa mga prosecutor nga ibutang sa rekord sa defense nga ang maong mga abogado dili makadawat og bisan unsang disclosure sa kaso, dili maka-access sa non-public filings, ug dili usab makadawat og non-public information nga may kalabotan sa kaso.
Dili usab sila entitled sa legally privileged meeting o personal nga pakigkita kang Duterte sa detention center.
Dugang pa sa prosecution nga subay sa Rome Statute of the International Criminal Court, ilabi na sa Article 68, adunay obligasyon ang korte nga protektahan ang kaluwasan, pisikal ug sikolohikal nga kahimtang, dignidad, ug privacy sa mga biktima ug mga testigo.
Kinumdoman nga gihimo niadtong Pebrero 23 hangtod 27 ang confirmation of charges hearing ni kanhing Pang. Rodrigo Duterte may kalabotan sa kasong crimes against humanity.
