DAVAO CITY – Gikatakdang ihatud sa ulahing kapahulayan karong adlawa, Enero 15, ang nitaliwan nga arsobispo sa Davao nga si Archbishop Emeritus Fernando Capalla.
Gikatakda kining ilubong sa crypt kon underground cemetery sa San Pedro Cathedral human sa ipahigayong funeral mass karong alas-10 sa buntag sa susamang simbahan nga pangunahan ni Cardinal Orlando Quevedo ug Cardinal Jose Advincula.
Pagasalmutan sab kini sa 14 ka myembro sa mga kaobispohan ug kaparian gikan ug gawas sa rehiyon.
Dungan sab nga ipahigayon ang interment rites alang kang Capalla sa Dormitium de San Pedro ilawom mismo sa altar sa San Pedro Cathedral.
Si Archbishop Capalla ang ikatulo nga arspobispo sa Davao nga ipahimutang sa nahisgutang lubnganan.
Kahinumduman nga Enero 6, dihang mipanaw ang giilang Mindanao peace advocate sa edad nga 89.
