Gipasabot ni Miss Philippines Earth 2025 Joy Barcoma ang hinungdan nganong wala siya makatambong ug makahimo sa iyang farewell walk atol sa coronation night sa Miss Philippines Earth sa Bukidnon.
Matud pa ni Barcoma nga andam na ang tanan alang sa iyang pagtambong, lakip na ang iyang flight, accommodation, ug makeup artist. Dugang niya, sulod sa pipila ka bulan nakigkoordinar siya sa pageant manager isip kabahin sa pagpangandam alang sa maong programa.
Apan sa adlaw mismo sa paglupad sa ubang reigning queens, didto pa siya gipahibalo nga dili na kinahanglan nga motambong tungod kay dili na kinahanglan ang iyang presensya sa coronation night.
Gipasiugda ni Barcoma nga gitahod niya ang desisyon sa organisasyon ug wala na niya kini gikuwestiyon.
Gipaambit usab niya nga una siyang gisultihan nga walay farewell walk alang sa tanang reigning queens, apan sa ulahi iyang nahibaw-an nga ang ubang titleholders nakabuhat niini human kini gihangyo kang Miss Philippines Earth owner nga si Lorraine Schuck.
Giangkon ni Barcoma nga nasubo siya tungod kay ang farewell walk usa sa pinakapaabot nga bahin sa panamilit sa usa ka beauty queen. Bisan pa niini, nagpabilin siyang positibo ug miingon nga dili matapos ang iyang katungdanan isip Miss Philippines Earth bisan pa sa pagtapos sa iyang reign.
Mitubag usab si Barcoma sa pangutana bahin sa social media post ni Miss Philippines Earth Brand Manager Astrud Schuck sa giingong paglapas sa kontrata. Matod niya, pinaagi lamang sa iyang mga higala niya nahibaw-an ang maong post.
Miingon siya nga bisan naghunahuna siya nga posible siya ang gipasabot sa post, wala nakigstorya kaniya gikan sa organisasyon bahin sa bisan unsang giingong paglapas sa iyang kontrata.
Dugang pa ni Barcoma nga nagpadala siya og mensahe kang Lorraine Schuck aron ipahibalo nga nakasabot siya kon dili na siya kinahanglan motambong sa coronation. Apan bisan nakita ang iyang mensahe, wala na kini matubag.
Giklaro ni Barcoma nga wala siyay kasuko batok sa Miss Philippines Earth organization. Matod niya, usa ka manager sa organisasyon ang nakig koordinar kaniya aron magpasalamat sa iyang mga nahimo ug kontribusyon.
