Dili pa ablihan sa Iran ang Strait of Hormuz alang sa mga barko gawas kon dawaton ug tumanon sa Estados Unidos ang mga kondisyon nga gipangayo sa Tehran.
Sumala kang Iranian Foreign Minister Abbas Araqchi, anaa na sa “katapusang hugna” ang mga panaghisgot, apan dili pa tugotan ang pag-abli pag-usab sa maong importante nga agianan sa dagat hangtod dili matuman sa Estados Unidos ang ilang mga gipangayo.
Lakip sa mga kondisyon sa Iran ang pagbayad og kompensasyon alang sa mga kadaot nga nahitabo tungod sa gubat, pagtangtang sa mga silot o sanctions batok sa nasud, ug paghunong sa mga hulga sa paggamit og puwersang militar.
Ang Strait of Hormuz usa sa labing importante nga agianan sa enerhiya sa kalibotan tungod kay dinhi moagi ang mokabat sa ikalima nga bahin sa tibuok kalibotang kargamento sa lana ug liquefied natural gas.
Matud sa Iran, ang bag-ong mga shipping lane ablihan lamang kon motuman ang Estados Unidos sa mga kondisyon nga mahimong magkasabotan sa duha ka kampo.
Sa pagkakaron, padayon ang panaghisgot samtang naghulat ang international shipping industry sa klarong kasabotan aron mabalik ang normal nga pag-agi sa mga barko sa Strait of Hormuz.
