Hugot nga misupak ang Samahan ng Progresibong Kabataan o SPARK sa ipatuman nga “Safer Cities Initiative” sa Department of the Interior and Local Government o DILG sa Metro Manila ug ubang bahin sa nasud.
Sumala kang Milo Basuel, posible kining mag-abri og purtahan sa pag-abuso sa gahum ug paglapas sa katungod sa katawhan sa mga law enforcers.
Gipunting sa SPARK nga adunay daan nang track record ang Philippine National Police o PNP sa sayop nga paggamit sa balaod, ug basin pa gani mosamot kini pinaagi sa profiling ug harassment batok sa kabatan-unan nga gitawag ni Sec.Jonvic Remulla nga “geng-geng.”
Kritikal usab ang grupo sa 10PM curfew alang sa mga menor de edad, nga ilang giingong arbitraryo ug makapugong sa katungod sa kabataan sa pagbiyahe o paghimo og lehitimong kalihokan.
Dugang pa sa SPARK, dili tanan kabataan adunay ID nga dayon mapakita sa mga pulis o barangay tanod, ilabi na ang out-of-school youth, unemployed, ug mga nagtrabaho sa informal sector sama sa helpers, errand boys, ug vendors.
Gihagit sa grupo si Remulla nga magpakita og klaro ug siyentipikong ebidensya nga epektibo ang juvenile curfew sa pagpakunhod sa krimen sa Metro Manila.
Kung wala, matod pa nila, kini nga mga polisiya usa lamang ka “shotgun approach” nga naglimita sa constitutional freedom sa kabatan-unan.
Nagpasidaan usab ang SPARK batok sa ubang polisiya ilawom sa “Safer Cities Initiative” nga posibleng magbutang sa peligro sa kabataan ug ordinaryong lungsoranon, ilabi na tungod sa unang isyu sa pagpangabuso sa PNP atol sa COVID-19 lockdown.
Kahinumdoman nga kaniadto, misupak na ang SPARK sa mga curfew ordinances alang sa minors pinaagi sa pagsang-at og kaso batok sa overreaching policies niadtong 2017 ubos sa administrasyon ni kanhing Pang.Rodrigo Duterte.
