Mipahayag og kabalaka ang non-profit organization nga Ilaw Pilipinas sa posibleng epekto sa pagtangtang sa systems loss charges sa bayranan sa kuryente.
Nagkanayon si Agnes “Beng” Garcia, National Convenor sa Ilaw Pilipinas, sa eksklusibong pakighinabi sa Bombo Radyo Philippines nga posibleng maapektuhan niini ang pipila ka electric cooperatives tungod kay sila na ang posible nga mopas-an sa pagbayad sa systems loss.
Gipasabot ni Garcia, nga bisan og positibo ug gikalipay sa kadaghanan ang maong hisgutanan sa State of the Nation Address ni Pangulong Ferdinand “Bongbong” Marcos Jr., kinahanglan gihapon nga tun-an pag-ayo ang mahimong epekto sa maong lakang.
Gipasiugda nila nga posible nga mawagtang ang maong bayranan apan ipasa ra gihapon kini balik sa mga konsyumer pinaagi sa ubang bayranan sa ilang singil sa kuryente.
Miapela na usab sila sa Energy Regulatory Commission ug sa publiko nga magpabiling mabinantayon ug aktibo sa pagmonitor sa mga isyu nga adunay kalabotan sa kuryente ug enerhiya sa Pilipinas.
