Misaka na ngadto sa 111 ang ihap sa mga namatay human miigo ang magnitude 7.4 nga linog sa kasadpang bahin sa Colombia niadtong Lunes.Miabot usab sa 87 ang ihap sa mga nasamdan, samtang nagpadayon ang rescue operation alang sa mga tawo nga posibleng natanggong ilawom sa mga naguba nga building sa nagkadaiyang mga siyudad.
Sumala sa datos sa U.S. Geological Survey, dunay giladmon nga 107 ka kilometro ang linog nga nahitabo duol sa San Jose del Palmar sa probinsya sa Chocó. Nabati usab ang kusog nga pag-uyog sa yuta sa pipila ka dagkong mga siyudad sa tibuok nasod. Gipangunahan sa bag-ong administrasyon ni Colombia President Abelardo De La Espriella ang pag-atubang sa maong dakong krisis pipila lamang ka adlaw human kini nanumpa sa katungdanan.
Gipatuman na usab ni De La Espriella ang national state of emergency ug gipasalig nga andam ang tibuok kagamhanan sa pagpatuman sa rescue operations ug paghatod og tabang sa mga apektadong komunidad. Gipunting sa presidente nga unang prayoridad sa iyang administrasyon ang pagluwas sa mga tawo nga posibleng natanggong ilawom sa mga naguba nga estruktura.
Dugang pa, mas sensitibo ang kahimtang tungod kay bag-o pa ang mga samad sa rehiyon gikan sa kusog nga mga linog nga miigo sa silingang nasod nga Venezuela niadtong Hunyo.Sa kasamtangan, padayon ang search and rescue operations samtang gisusi pa sa mga otoridad ang gidak-on sa kadaot ug panginahanglan sa mga apektadong komunidad.
Kahinumduman, pipila pa lamang ka adlaw ang milabay sukad nanumpa si De La Espriella isip pangulo sa Colombia sa wala pa mitumaw ang maong dakong krisis.
