Patay ang usa ka 13-anyos nga Grade 9 nga estudyante human gidunggab sa iyang kauban sa klase sulod sa Las Piñas National High School sa Barangay Daniel Fajardo, Las Piñas City, kagahapong adlawa, Hulyo 31. Sumala pa sa Southern Police District (SPD) ug kang Las Piñas Acting Police Chief Fermin Armendarez III, nahitabo ang insidente sa atubangan sa usa ka classroom sa ikaupat nga andana sa maong tulunghaan atol sa oras sa tingpahulay.
Dugang pa niini, misangpot sa mainitong panaglalis ang duha ka estudyante hangtod nga kalit nga mibira og kutsilyo ang suspek ug gidunggab ang biktima sa wala nga bahin sa dughan. Gilayon nga gidala sa Las Piñas District Hospital ang biktima, nga giila lamang sa inisyal nga “A.D.O.”, apan gideklarar kining patay sa misusi nga doktor alas 4:53 sa hapon.
Lakip sa nahibal-an sa mga otoridad nga ang suspek, nga giila sa inisyal nga “M.J.E.”, usa ka bata nga nakasupak sa balaod (Child in Conflict with the Law o CICL). Itugyan kini sa City Social Welfare and Development Office (CSWDO) subay sa mga balaod nga nanalipod sa mga menor de edad.Sa pagkakaron, nagpadayon ang imbestigasyon sa kapulisan aron matino ang tinuod nga hinungdan sa maong madugoon nga insidente.
