DAVAO CITY – Gi-awhag sa Civil Service Commission Davao Region ang katawhang Dabawenyo alang sa pag-avail sa mga ipangtanyag nga serbisyo sa ipahigayong “Government Service Fair”.
Ipahigayon ang maong aktibidad sa Sm City Davao, Annex Building (Atrium) sugod sa adlaw nga Lunes, Setyembre 19 hangtud 23 ning kasamtangang tuig gikan alas 10 sa buntag hangtud alas 9 sa gabii.
Pipila ka mga serbisyo ang mamahimong i-avail sa katawhan gikan sa mga musalmot nga mga ahensya sa panggamhanan sama na lamang sa Bureau of Fire Protection, Bureau of Internal Revenue, City Government of Davao, Civil Service Commission nga adunay tanyag nga legal consultation ug counseling, Department of Agriculture nga mang-apud-apod og mga liso ug semilya sa tanom, Department of Environment and Natural Resources, Department of Health nga magpahigayon og vaccination ug medical consultation, Department of Labor and Employment, Department of Public Works and Highways, GSIS, Land Transportation Office nga magpahigayon og issuance sa Student Permit, NBI nga magpahigayon og NBI Clearance Processing, NHA, Pag-Ibig Fund, ug Philippine Coconut Authority.
Ang maong lima ka adlaw nga Government Service Fair ang kabahin sa pagsaulog sa ika-122 nga anibersaryo sa Philippine Civil Service.
