Nagbilin og dili moubos sa 20 ka mga patay ang kusog nga flash flood nga miigo sa amihanang-sidlakang bahin sa Afghanistan niadtong Lunes, Hulyo 20. Sumala pa sa Taliban-run government, ang siyudad sa Parun, kapital sa probinsya sa Nuristan, mao ang pinakagrabeng naapektuhan sa maong flash flood, diin daghang komunidad ang nakasinati og dakong kadaot tungod sa kalit nga pagbaha.
Dugang pa niini, dili moubos sa 80 ka mga tawo ang nasamdan tungod sa maong katalagman, samtang gikabalak-an sa mga awtoridad nga mosaka pa ang ihap sa mga biktima human kapin sa 100 ka mga tawo ang gikatahong nawala hangtod sa gabii sa maong adlaw. Sa pagkakaron, gipadayon sa mga otoridad ang search and rescue operations aron pangitaon ang mga nawala ug matabangan ang mga apektadong residente, apan naglisod sila sa pag-abot sa pipila ka mga lugar tungod sa kalapad sa kadaot nga nahimo sa pagbaha.
Lakip sa mga hagit nga giatubang sa mga otoridad mao ang lisod nga pag-access sa mga hilit nga komunidad nga grabeng naapektuhan sa kalamidad. Kahinumduman nga ang Afghanistan usa sa mga nasod nga grabeng naapektuhan sa epekto sa climate change o pagbag-o sa klima, diin mas kanunay na ang grabeng pag-ulan ug pagbaha sa pipila ka bahin sa nasod.
Matud pa sa mga eksperto, nakadugang usab sa kabug-at sa pagbaha ang kaylap nga pagkaguba sa mga lasang tungod sa pagkunhod sa gidaghanon sa mga kahoy nga mosuyop sa tubig-ulan ug makatabang sa pagpugong sa kusog nga pag-agas sa tubig.
