Gipahimangnoan ni Presiding Officer Chiz Escudero si Atty. Amando Ligutan nga isip abogado sa impeachment trial, kinahanglan niyang bulagon ang iyang papel isip legal counsel ug ang iyang estilo isip guro sa pagkomento sa mga isyu.
Matod ni Escudero, nalapas ni Ligutan ang mga lagda sa Senado human kini makahatag og mga pahayag kabahin sa mga nahitabo nga pagpangutana atol sa impeachment trial ug sa mga isyu nga may kalambigitan sa defense.
Gipasabot ni Escudero nga bisan dili mawala kang Ligutan ang iyang pagka-guro bisan asa siya moadto, lahi ang mga patakaran nga kinahanglan sundon sulod sa impeachment proceedings.
Mubo niyang gipasiugda nga kinahanglan “you have to unbundle it” ug “you have to decouple it,” pasabot nga kinahanglan klarong bulagon ni Ligutan ang iyang papel isip abogado gikan sa iyang personal nga estilo sa pagtudlo o pagkomento.
Dugang pa, gipahinumdoman siya nga ang impeachment trial adunay kaugalingong rules ug procedures nga kinahanglan respetohon sa tanang abogado nga nag-apil sa proseso.
Sa pagkakaron, padayon ang impeachment proceedings samtang ginabantayan sa presiding officer ang pagsunod sa mga abogado sa mga lagda sa Senado ug sa proper conduct sulod sa trial. | VIA BOMBO EROS PAJOTA
