Nanawagan ang environmental group nga BAN Toxics og mas hugot nga pagpatuman sa Republic Act 9003 o Ecological Solid Waste Management Act human sa pagdaghan sa basura gikan sa Manila Bay nga naanod ngadto sa mga waterways sa Parañaque City.
Matud sa grupo, gipakita sa maong insidente ang problema sa sayop nga paglabay sa basura, kakulang sa waste management facilities ug ubos nga kahibalo sa publiko sa hustong segregation ug disposal.
Base sa Compendium of Philippine Environmental Statistics 2025, kapin 20,458 lamang ang materials recovery facilities sa nasud kumpara sa kapin 42,000 ka barangay.
Gidasig sa BAN Toxics ang national ug local governments nga palig-onon ang information campaign kabahin sa hustong pagdumala sa basura.
Nanawagan usab sila nga maapil sa formal waste management system ang informal waste workers ug mahatagan og social ug health benefits, training ug mas luwas nga working conditions.
Kahinumdoman nga nahimong viral ning semanaha ang Redemptorist Water Channel sa Baclaran River tungod sa daghang basura nga mitungha human sa kusog nga pag-ulan sa Metro Manila.
