Gisubay pa karon sa Bureau of Fisheries and Aquatic Resources (BFAR) 11 kung unsa ang hinungdan sa kamatayon sa usa ka balyena na nakaplagan na lamang nga wala nay kinabuhi daplin sa baybayon sa Calderon Seaside Kilometer 22, Bucana, Bunawan District, Davao City.
Apan nagtuo ang otoridad nga posibleng namatay kini sa dynamite fishing gumikan sa daw mga samad-samad nga namatikdan sa lawas niini.
Gipadaplin sab ang posibilidad nga posibleng basura ang hinungdan sa kamatayon niini sanglit walay narekober sulod sa tiyan niini.
Kahinumduman nga sa milabay nga semana, usa sab ka balyena ang narekober sa Mabini Compostela Valley diin narekober sulod sa tiyan niini ang 40 kilos nga basura nga gitudlong hinungdan sa kamatayon niini.
Atol sa gipahigayong necropsy sa balyena nga nagsukod ug 10.4 feet, gikanayon ni Darrell Blatchley, director sa D’Bone Collector Museum nga wala siyay nakuhang mga pagkaon sulod sa tiyan sa whale.
Kahinumduman nga sulod lamang sa duha ka semana, duha na usab ka balyena ang nakaplagang patay sa Davao.
Tungod niini, moabot na sa upat ang kinatibuk-ang ihap sa mga marine mammals ang namatay sa Davao sa nakalabay nga tulo ka bulan.
Nahabwa na usab ni Blatchley ang 99 porsiento sa unod sa Balyena ug iya na kining gilubong, samtang gina-proseso na usab niini ang bukog sa balyena aron nga i-display sulod sa iyang museum.
