DAVAO CITY – Napalgang patay ang duha ka lumad nga gipusil sa wala mailihing suspetsado sa may Barangay Marahan, Marilog District, Davao City, pasado alas 10:00 sa buntag, niadtong Sabado.
Giila sa Marilog Police ang mga biktima nga sila Datu Alberto Tumindog ug Jhonny Masangcay, mga mag-uuma gikan sa tribong Bagobo ug lumulupyo sa nahisgutang dapit. Pagsaysay pa sa nagbangotang pamilya, usa ka pula ug usa ka puti nga pick-up ang gisakyan sa mga suspek diin nagpakaaron ingnon nga mupalit og yuta sa nahisgutang lugar. Apan, kalit na lamang gipamusil ang mga biktima igo sa ulo nga maoy hinungdan usab sa ilang hinanaling kamatayon.
Gitutukan sab sa kapulisan ang anggulong posibling kaila lamang sa mga biktima ang mga suspek sanglit dunay nahitabo nga panaglalis ayha paman gipamusil ang mga biktima. Nagpadayon gihapon ang ginahimong imbestigasyon sa Marilog Police sa maong krimen.
Via || LJ Florendo
