DAVAO CITY – Dakong tabang sumala pa ang bag-ohay pa lamang nga launching sa Drug Education Module for Community-Based Rehabilitation and Aftercare Program nga gihubad sa pinulongan nga Arabic sa Davao City Anti-Drug Abuse Council (CADAC) aron nga malikayan ang pagkatag sa iligal nga droga sa Muslim communities dinhi sa dakbayan sa Davao.
Una niini, gidayeg ni Konsehal Pilar Braga, chair sa Committee on Education, Science and Technology, Arts and Culture ang mga nagkadaiyang sektor sama sa CADAC, Philippine Drug Enforcement Agency (PDEA), Ustads ug Ulamas sa Madrasah sa pagpreparar sa nahisgutan nga education modules on anti-drugs nga gihubad sa Arabic.
Kahinumduman nga kaniadtong milabay nga semana dihang gilusad ang translated module isip kabahin sa Comprehensive Dangerous Drugs Act of 2002.
Laraw sa maong module nga magamit sa Madrasah students ug Muslim students ilalom sa Alternative Learning System (ALS).
Gikanayong laraw sab sa maong translation nga mapromotar ang cultural sensitivity nga gihangyo sa College of Islamic Studies sa Ateneo de Davao University (AdDU).
