Gipahibalo sa Department of Public Works and Highways o DPWH ang pagpatuman sa water detention facilities ug uban pang flood control projects aron mapakunhod ang grabeng pagbaha sa Parañaque City.
Sumala kang Public Works Secretary Vince Dizon, kabahin kini sa mas lapad nga flood management program sa gobyerno alang sa Metro Manila.
Gikumpirma usab ni Dizon nga ipadayon na ang dugay nang pending nga Parañaque Spillway Project, human makuha ni Parañaque 2nd District Representative Brian Yamsuan ang garantiya gikan sa maong opisyal alang sa proyekto.
Gipahayag usab ni Yamsuan ang kabalaka nga posibleng mosamot ang pagbaha sa Parañaque kung mahuman ang pipila ka flood control projects nga mahimong mopadulong sa dakong volume sa tubig ngadto sa Laguna de Bay.
Dugang pa niini, giingon ni Dizon nga dili na igo ang yano nga dredging ug paglimpyo sa mga waterways aron masulbad ang problema sa pagbaha.
Lakip sa mga gitun-an nga solusyon ang pagtukod og underground water detention basins sa mga bakanteng luna, parke, basketball court ug uban pang open spaces aron temporaryong tigoman ang tubig nga dala sa ulan ug mapugngan ang pag-awas niini nga mahimong hinungdan sa pagbaha.
Sa kasamtangan, giila sa DPWH ang right-of-way isip usa sa mga dagkong hagit sa pagpatuman sa maong mga proyekto.
