Giklaro sa Department of Public Works and Highways nga adunay P2.024 bilyon nga alokasyon alang sa priority flood mitigation projects sa Davao Region ubos sa proposed 2027 national budget.
Nahimo ang klaripikasyon human mipahayag si ACT Teachers Rep. Antonio Tinio nga walay nakitang flood control allotment sa tanang district engineering offices sa Region 11 atol sa congressional briefing.
Matod ni Tinio, 84 sa 197 ka district engineering offices sa DPWH ang walay allotment, lakip ang tanang opisina sa Davao Region.
Dugang pa, iyang gikuwestiyon nganong walay nakabutang nga pondo bisan kasagarang makasinati og pagbaha ang pipila ka bahin sa rehiyon.
Apan sumala sa DPWH, ang P2.024 bilyong pondo sakop sa pagtukod ug maintenance sa flood mitigation structures ug drainage systems, lakip ang mga proyekto ubay sa Agusan River ilawom sa Mindanao River Basin program.
Lakip usab sa alokasyon ang pagtukod ug rehabilitation sa pipila ka major river basins sa rehiyon.
Sa pagkakaron, kabahin pa kini sa proposed 2027 budget nga moagi pa sa deliberasyon sa Kongreso. | VIA BOMBO EROS PAJOTA
