Gipadayag ni Labor Secretary Francis Tolentino nga resulta sa sunod-sunod nga konsultasyon tali sa gobyerno, labor groups, ug mga employer ang gihimong mga lakang alang sa pagsaka sa suweldo aron makab-ot ang balanse nga kausaban nga makabenepisyo sa mga mamumuo ug sa samang higayon kaya usab sa mga negosyo.
Sumala pa sa Department of Labor and Employment (DOLE), adunay pipila ka gagmayng negosyo nga nagpahayag og kabalaka ug pagsupak tungod sa posibleng dugang nga gasto sa ilang operasyon kon ipatuman ang mas taas nga suweldo.
Dugang pa niini, nagpadayon sa pagkakaron ang DOLE sa wage review sa ubang mga rehiyon sa nasod, lakip ang Region 4A, Region 3, ug Cebu, alang sa posibleng bag-ong pagsaka sa suweldo sa mga mamumuo gawas sa Metro Manila.
Samtang, gipatin-aw usab nga ubos ang Wage Order NCR-27, ipatuman sa duha ka hugna ang pagsaka sa minimum nga suweldo sa Metro Manila. Sumala pa, ang unang P60 nga dugang-suweldo mahimong epektibo sa Hulyo 19, 2026, samtang ang nahibiling P25 ipatuman sa Enero 20, 2027.
Dugang pa niini, kon hingpit nang mapatuman ang wage increase, mosaka ngadto sa P780 gikan sa P695 ang adlawang minimum nga suweldo sa mga mamumuo sa non-agriculture sector sa Metro Manila.
Lakip usab sa madugangan ang adlawang suweldo sa mga agricultural workers, ingon man sa mga empleyado sa retail ug service establishments nga adunay 15 o mas ubos pa ka mga trabahante, ug sa manufacturing establishments nga adunay ubos sa 10 ka mga empleyado, diin mosaka kini ngadto sa P743 gikan sa P658.
