Gitahud sa defense team ni Vice President Sara Duterte ang desisyon sa Korte Suprema nga nagbasura sa petisyon nga nagkuwestiyon sa serye sa mga hearing sa House Justice Committee may kalabotan sa impeachment complaint batok sa bise presidente.
Sumala pa ni Defense Team Deputy Spokesperson Atty. Justin Nicol Gular, ang pagbasura sa petisyon wala gibase sa merito o kabug-aton sa mga argumento nga ilang gipresentar.
Hinuon, giingon ni Gular nga gibasura kini sa Korte Suprema tungod kay nahimo na kining moot and academic, sanglit nagpadayon na ang impeachment proceedings sa Senado nga karon naglingkod isip impeachment court.
Dugang pa niini, gipasabot ni Gular nga gidahom na sa depensa ang maong desisyon ug ilang gitahod ang hukom sa kataas-taasang hukmanan.
Kahinumduman, niadtong Agosto 5, gipagawas sa Korte Suprema ang desisyon sa mga gihiusang petisyon nga gisang-at sa kampo ni Vice President Duterte ug sa ubang grupo sa mga abogado nga nailhang nagsuporta sa pamilyang Duterte atol sa pagdungog sa House Justice Committee sa mga reklamong impeachment batok sa bise presidente.
Sa kasamtangan, nagpadayon ang impeachment proceedings sa Senado isip opisyal nga impeachment court.
