Misaka na sa 23 ang ihap sa mga namatay tungod sa epekto sa Habagat ug nangaging bagyong Luis ug Maymay, base sa datos sa Office of Civil Defense alas 6:00 karong buntaga, Agosto 17, 2026.
Sa maong ihap, 15 ang gikan sa Benguet, tulo sa Rizal, tulo sa Batangas ug usa sa Quezon. Lakip sa hinungdan sa kamatayon ang landslide, pagkalumos, rockslide, natumpagan og kahoy ug nakuryentehan.
Nakaangkon usab og samad ang 17 ka tawo sa Ilocos Sur, Benguet, Abra, Rizal ug Cavite, samtang tulo pa ang missing sa Batangas.
Kapin 4.9 milyon ka indibidwal o 1,410,800 ka pamilya ang naapektuhan sa mga kalamidad sa Luzon, Visayas ug Mindanao.
Anaa sa 31,456 ka tawo ang nagpabilin sa 407 evacuation centers.
Narekord usab ang 1,845 ka balay nga nadaot, diin 178 ang hingpit nga naguba, samtang kapin ₱689.6 milyon ang kadaot sa agrikultura.
Gilauman nga magpadayon ang epekto sa Habagat sa Luzon ug kasadpang Visayas.
